ޖުވާ ހަރާމިއްޔާ ފޮރެކްސް ޓްރޭޑްވެސް ހަރާމް ވާނެބާ!

ދިވެހިރާއްޖޭގެ ބޭންކު ތަކުން ދޫކުރާ ވިސާ ކުރެޑިޓް އަދި ޑެބިޓް ކާޑުތަކުން ދުނިޔޭގެ މަޝްހޫރު ފޮރެކްސް ޓްރޭޑިންގ ޕްލެޓްފޯމްތަކަށް ޑިޕޮސިޓް ކުރެވެނީ ވަރަށް އުނދަގުލުންނެވެ. ފޮރެކްސް ޓްރޭޑިންގ ހަރާމްވީމަ ކަމަށް ވެދާނެއެވެ. ހަރާމެކޭ އަޅުގަނޑު ބުނާކަށް ނެތީމެވެ. ގައިމުވެސް ބޭންކު ލޯނެއް ނެގުމުން އެއަރާ އިންޓުރެސްޓްއަކީ ރިބާ ނޫންކަމަށް ދައްކާ ހުއްޖަތުތަކަށްވުރެ ފޮރެކްސް ޓްރޭޑިންގގައި ރިބާ ނުހިމެނޭކަމަށް ދައްކަންޖެހޭ ހުއްޖަތް މަދުވެފަ ހެކި ގިނަވާނެއެވެ. އަޅުގަނޑަކީ އިލްމުވެރިއެއް ނޫނެވެ. ނަމަވެސް ފޮރެކްސް ޓްރޭޑިންގ އަކީ ކިހިނެތް ކުރާ މުޢާމަލާތެއްކަން އަޅުގަނޑަށް ކިޔައިދެވިދާނެއެވެ. އަންނަ ހިންޏަށްވުރެ ހިތާމަ ހުރީ ރެއަކާ ދުވާލަަށް މިލިއަނުން ދައުރުވާ 'ޖުވާ' އެކައުންޓަށް އެއްވެސް ދަތިކަމެއް ނެތި ފައިސާ ޖަމާކޮށް ނެގޭއިރު، ޤާނޫނީ ހުރަހެއް ނެތް ފޮރެކްސް ޓްރޭޑިންގ އަށް ބޭންކުތަކުން ދަތި ކުރާކަމެވެ.

މިއާޓިކަލް މިލިޔަނީ ފޮރެކްސް ޓްރޭޑިންގ ހަލާލު ކޮށްދޭކަށް ނޫނެވެ. ބިސްމި ކިޔާފައި ކަތިލުމުން ހަލާލުވާ ކުކުޅާއި، ބިސްމި ނުކިޔާ ކަތިލުމުން ހަރާންވާ ކުކުޅު މިސާލަކަށް ނަގާކަށްވެސް ނޫނެވެ. ޖުވާ އާއި ފޮރެކްސް ޓްރޭޑިންގ ގެ ތަފާތު ކިޔައިދިނުމަށެވެ. ޓްރޭޑިންގ އަކީވެސް ޖުވާ އާއި އެއްގޮތަށް ގެއްލުމާ ފައިދާ ހިމެނޭ އެއްޗެކެވެ. ނަމަވެސް ފޮރެކްސް ޓްރޭޑިންގ އަކީ އިލްމީ ޤާބިލްކަމެއް ހުރެގެން ފައިސާ ހޯދުމަށް ކުރެވިދާނެ ފަންނީ މަސައްކަތެކެވެ. ކުރު ގޮތަކަށް ބުނާނަމަ ޖުވާ އަކީ ދެމީހަކަށްވުރެ ގިނަ މީހުން ވަކި ގޮތަކަށް ކަމެއްވާނެ ކަމަށް ހީކޮށް ފައިސާއިން ބެޓްކޮށްގެން ބެޓްއިން މޮޅުވާ މީހާއަށް ފައިސާތައް ލިބުމެވެ. މިސާލަކަށް ޤައުމީ ޓީވީއިން ދައްކާ ރާއްޖެ-އިންޑިއާ މެޗް އިން މޮޅުވާނެ ޓީމެއް އެސް.އެމް.އެސް ކޮށްގެން ދިމާކޮށްގެން އިނާމު ހޯދުން ވާނީ ޖުއާއަށެވެ. އަޅުގަނޑު ބުނިއެއްޗެއް ނޫނެވެ. އެފަދަ ގޮތަކަށް މޮޅުވާ މީހާއަށް އެލިބޭ ފައިސާއަކީ ކަނޑައެޅިގެން ހަރާމް ފައިސާކަމަށް ދަލީލުތަކުގައިވެއެވެ. 18 އޮކްޓޯބަރ 2024 ގެ ހުކުރު ހުތުބާ އަޑުއެހިމީހަކު ޖުވާކުޅުމުން ދުރުހެލިވާނެއެވެ.

ސުރުހީގައި ރާއްޖޭގައި ޖުވާކުޅުން ހުއްދަވީތޯ ސުވާލުކުރުމުން މިލިޔުން އެއްކޮށް ކިޔާނުލާ އިންސާފެއްނެތި ދެއިނގިލީގެ ފޫވެއްޓޭވަރަށް ކޮމެންޓް ކުރުމަކުން ހަޤީގަތް ސާފެއް ނުވާނެއެވެ. މިސާލަކުން ފަށާނަމެވެ. އަޅުގަނޑުގެ ބޭންކު އެކައުންޓަށް ރައްޓެއްސަކު ބައިލައްކަ ރުފިޔާ ޖަމާކުރީ އޭނާގެ ދަށުން މަސައްކަތް ކުރާ ބިދޭސީންނަށް މުސާރަ ދިނުމަށް އޭނާއަށް ރާއްޖެއަށް ނާދެވިގެންނެވެ. ފައިސާ ޖަމާވުމާއެކު އަޅުގަނޑަށް ބޭންކުން ގުޅާ ފައިސާގެ ތަފްސީލު ހޯދުމަށް އެދުނެވެ. ބޮޑު ސިޓީއަކުން ސާބިތުކޮށްދޭން ޖެހުނީ އަޅުގަނޑަކީ ވަގެއް ނޫންކަމާއި އެއީ ވަގު ވިޔަފާރިއަކުން ހޯދި ހަރާމް ފައިސާ ނޫންކަމެވެ. ދުވާލަކަށް ވަކި ލިމިޓަކުން ބޭންކު އަކުންޓަށް ލައްކައިން ރުފިޔާ ޖަމާވާ އާދައިގެ ވަޒީފާތަކުގައި އުޅޭ މީހުން އެބައުޅެއެވެ. އެމީހުންނަށް ފައިސާ ޖަމާވަނީވެސް ދިވެހި އެކައުންޓަކުންނެވެ. އެއީ ފުލެއް ނެތް ކާށިދޫ ކަނޑާ ގުޅިފައި ހުންނަ އެކައުންޓަކީ ބާއޭ ސުވާލު އުފެދެއެވެ. ބޭންކުން އެކަމާ ސުވާލެއް ކުރުމުގެ ބާރެއް ނެތީތޯއެވެ.

މިދައްކަން އުޅޭ ވާހަކައަކީ ރާއްޖޭގައި ޖުވާގެ އަވާގައި ޖެހި ބަނގުރޫޓުވާ ބަޔަކާއި ހަރާމް ފައިސާއިން މުއްސަނދިކަން ހޯދާ ބަޔަކާއި، ޖީލެއް ޖުވާއިން މަސްތުވާން ދޫކޮށްލައިގެން ތިބި ބޭންކު ތަކާއި ޤާނޫނީ ބާރުލިބިފައިވާ މުއައްސަސާތަކުގެ އިހުމާލު ބޮޑުވާހަކައެވެ. ނުކުޅެދުންތެރިކަމާއި ގަޔަށްލުއިކަން އިންތިހާއަށް ބޮޑުވެފައިވާ ވާހަކައެވެ. ޖުވާ ކުޅޭ އެޕްތަކާއި ސައިޓްތަކުގައި ޖުވާކުޅެން ފައިސާ ޖަމާކުރަންވީ އެކައުންޓް ނަމްބަރާއި މީހާގެ ނަން ފާޅުގައި ފެންނާނެހެން ޖަހާފައި އެހުންނަނީއެވެ. އެއީ ކާކުކަން ބޭންކަށް އެނގޭނެއެެވެ. އޭނާގެ ފޯނު ނަމްބަރާއި އައި.ޑީ ކާޑް ނަމްބަރުވެސް ބޭންކަށް އެނގޭނެއެވެ. ކޯޓުން އެ އެކައުންޓް ފްރީޒްކުރުމަށް އަމުރު ނެގުމަށްވެސް ހުރަހެއް ނެތެވެ. ނަމަވެސް ނުހުއްޓުވެނީއެވެ. ހުއްޓުވަން ނޫޅެނީއެކޭ ބުނާކަށް ނެތީމެވެ. އެވަރުގެ ޒިންމާއެއް ނެގުމުގެ ޤާބިލްކަން ނެތީއެވެ. ނޫނީ ހަރާމް ވިޔަފާރިއަކަށް ވިޔަސް ބޮޑު ނަފާއެއް ވާތީ ހަނުތިބީއެވެ.

ރާއްޖޭގެ ޤާނޫނީ ބާރުލިބިގެންވާ ބަޔަކު ނޫސްބަޔާނެއްގައި ޖުވާ ކުޅޭ ސައިޓްތައް ބްލޮކް ކޮށްލިަކަމަށް ބުންޏެވެ. އެފަހުން ވާނީ 15 ވަރަކަށް މިނެޓެވެ. ހަމަ އެސައިޓްތައް އެއިނީ އޮންލައިންވެ ހަމަ އެއްކަލަ ދިވެހި މީހާގެ އެކައުންޓް ނަމްބަރާއި ނަމާއި އެކު ޖާހަފައެވެ. ފަސްހާސް ރުފިޔާ ޑިޕޮސިޓްކުރުމަށްފަހު ފުރޮޅެއް އަނބުރާލައިގެން ފަސްލައްކަވެސް ފައިދާ ނަގަންވީއެވެ. ފަސޭހައިން މުއްސަނދި ވާންވީއެވެ. ހަރާމް ފައިސާއިން ކާންދީގެން ދަރިންގެ ހަށިގަނޑުގައި ހަރާން ލޮކިމަސް ޖަހުވަންވީއެވެ. ހުއްދަ ނޫންކަމެއް ކުރުމަށް އިސްލާމީ ޤައުމަކުން ފުރުޞަތު ނުދޭނަމަ އެކަން މިހާ ފާޅުކަން ބޮޑު ގޮތެއްގައި ނުކުރެވޭނެއެވެ.

ޖުވާއާއި ހިލާފަށް ފޮރެކްސް ޓްރޭޑިންއަކީ ތަފާތުކަމެކެވެ. ރާއްޖޭގައި އާންމުކޮށް ބޭނުންކުރާ ފޮރެކްސް ޓްރޭޑިންގ ޕްލެޓްފޯމްތަކުގައި އިންޓްރެސްޓް އެއް ނުނަގައެވެ. ކަންމަތީ ފިހާރައިގެ ކައުންޓަރަށް އާދީއްތަ ދުވަހު 100 ޑޮލަރު ގަންނަން ދިއުމުން ދިން ރޭޓަކީ ޑޮލަރަަކަށް 15.42 ރުފިޔާއެވެ. ޖުމްލަ ދިނީ 15.42ރ އެވެ. ހޯމަ ދުވަހު ރޭޓް ތަންކޮޅެއް ރަގަޅުވުމުން ގޮސް ބެލިއިރު އެތަނުން ޑޮލަރު ގަންނަ ރޭޓަކީ ޑޮލަރަކަށް 16ރ އެވެ. އަޅުގަނޑު އާދީއްތަ ދުވަހު ގަނެފައިވާ 100 ޑޮލަރ 16ރ ގެ ރޭޓުން ވިއްކާލީމެވެ. 58ރ ގެ ފައިދާއެއް އަޅުގަނޑަށް ލިބުނީއެވެ. ހަރާމެކޭ ހަލާލެކޭ ބުނަން ނޭގެއެވެ. އެނެްމެ ތިލަ މާނައިގައި ފޮރެކްސް ޓްރޭޑިންގ ގެ ފަލްސަފާ ކިޔައިދެވޭތޯ ބެލީއެވެ.

ފޮރެކްސް ޓްރޭޑިންގ ގެ އެންނެ އާންމު ޕެއަރ ކަމަށްވާ XAU/USD ނަގާނަމެވެ. މިއީ ރަނާ ޔޫ.އެސް.ޑޮލަރ ޕެއާރ އެވެ. މީގައި ވާގޮތަކީ ރަނުގެ އަގު ދަށްވެފައިވަނިކޮށް ރަން ގަނެލަނީއެވެ. ހިތުހިސާބަކަށް ނޫނެވެ. އިލްމީ ފަލްސަފާއަކުން ޗާޓުގައި ހިމެނޭ ކެންޑަލް ސްޓިކްތައް ދަތުރުކުރާގޮތް ދަސްކޮށް، ޔޫ.އެސް ޑޮލަރަށް އަންނަ ލޮޅުންތައް ނޫސްތަކުން ބަލާފައެވެ. އަޅުގަނޑު ރަން ގަނެލި ފަހުން 30 ވަރަކަށް މިނެޓްފަހުން ރަނުގެ އަގު އުފުލުނެވެ. ރަނުގެ އަގު އުފުލުނީ ޑޮލަރުގެ އަގު ދަށްވުމުންނެވެ. ޑޮލަރުގެ އަގަކީ ސިކުންތަކުން ސިކުންތަކުން ބަދަލުވާ އެއްޗެކެވެ. އެހެންކަމުން ރަނުގެ އަގުވެސް ޑޮލަރގެ އަގާއި އެއްގޮތަށް ދާނީ ބަދަލުވަމުންނެވެ. އަގު މަތިވުމުން އަޅުގަނޑު ގަނެފައިހުރި ރަން ވިއްކާލީއެވެ. 0.01 ސެންޓަށް ގަނެފައިވާ ރަން އައުންސަކުން 100 ޑޮލަރުގެ ފައިދާވެސް ކަމުގެ އިލްމާއި ހުނަރު ހުރި މީހަކަށް ހޯދިދާނެއެވެ. މިހިންގި ވިޔަފާރި މުޢާމަލާތުގައި ހަރާމް ހަލާލު ކިޔައިދޭން އަޅުގަނޑަށް ނޭނގޭތީ އެދާއިރާގެ މީހުންނަށް އެކަން ދޫކޮށްލާނަމެވެ. އެދާއިރާއިން އަޅުގަނޑު އަދި ވާނީ 'ސޭކް' މީހަކަށެވެ. އެެހެންކަމުން އަޅުގަނޑު ކިޔުންތެރިންނަށް ހަލާލާއި ހަރާމް ކިޔައިދިނުން އިންސާފުވެރިއެއް ނުވާނެއެވެ.

އެހެންކަމުން ފޮރެކްސް ޓްރޭޑިންގ ހަލާލެކޭ އަދިވެސް ނުބުނާނަމެވެ. ހަމަ ޔަގީނުންވެސް ޖުވާއަށް ވާގޮތަށް ފޮރެކްސް އިންވެސްޓް ކުރާމީހުން ތިބެއެވެ. މިސާލަކަށް ޔޫ.އެސް ނިއުސް އަންނަ ގަޑީގައި ކެންޑްލް ސްޓިކް ހަރަކާތް ކުރާނީ ނިއުސްއަށެވެ. ނިއުސްގައި ޔޫ.އެސް ޑޮލަރގެ އަގު ދަށްކަމަށް އައިސްފިނަަމަ ރަނުގެ އަގު އިންތިހާއަށް އުފުލެއެވެ. އާންމުކޮށް ނިއުސް އަންނާނީ ބަންދު ނޫން ދުވަސްތަކުގެ ރާއްޖޭގެ ގަޑިން 17:30 ގައެވެ. ބައެއް މީހުން ގަޑީގެ ކުރިން ހިތު ހިސާބަށް ރަން ގަނެފަ ބަހައްޓަނީ އެއްވެސް ވިސްނުމެއްނެތި ފައިދާވެދާނެ ކަމަށް ހީކޮށްގެންނެވެ. މިއީ ވެދާނެކަމެއް ކަމަކަށްވުރެ ނުވުން ގާތް ގޮތެކެވެ. އެއްކަލަ ފުރޮޅު އަނބުރައިގެން ލާރިގަނޑެއް ލިބޭފަދައިން ޖަހާ ހިސާބެކެވެ. މިއީ ސީދާ ޖުވާއެވެ. ނުވަތަ ފައިސާ ގޭމްބުލް ކޮށްލީއެވެ. އޭގެ ބަދަލުގައި ނިއުސްގެ ހިސާބުތައް ލިބުމުން ޔޫ.އެސް ޑޮލަރ ގެ އަގު ދަށްނަމަ ރަނުގެ އަގު މަތިވާނެކަން އިލްމީ ގޮތުން ޔަޤީންވާތީ ގަނެފަ، ރަނުގެ އަގު ބޮޑުވުމުން ވިއްކާލުމުން ލިބޭ ފައިދާގައި ރިބާ ހިމެނޭކަމަށް ފޮރެކްސް ޓްރޭޑްކުރާ މީހުން ޤަބޫލެއް ނުކުރެއެވެ. އެއްވެސް އިންޓްރަސްޓެއް ދައްކާކަށް ނުޖެހެއެވެ. މިނެކިރުމުގައި އުނިއިތުރެއް ނެތެވެ. އާނއެކެވެ. ހިތު ހިސާބަށް ލޮޓު ސައިޒެއް ބެލުމެއް ނެތި ދާނެހެން ހީވާކޮޅަކަށް ލާރި ޖަހައިގެން ޓްރޭޑް ކުރަނީ ޖުވާ ކުޅޭ މީހުންނެވެ. އެއީކީ ފޮރެކްސް ޓްރޭޑިންގ ގައި އިންވެސްޓް ކުރުމެއް ނޫނެވެ.

އަނެއްކާވެސް ބާރުލާފައި ބުނެވޭތޯ ބަލާނަމެވެ. ޖުވާ ކުޅުމަކީ ކަނޑައެޅިގެން ހަރާން އަދި ޤާނޫނީ ގޮތުންވެސް މަނާ ކަމެކެވެ. އަދަބު ކަނޑައެޅިގެންވާ ކުށެކެވެ. ފޮރެކްސް ޓްރޭޑިންގ އަކީ ޤާނޫނަކުން މަނާ ނޫން އަންރެގިއުލޭޓެޑް (ޤާނޫނީ ގޮތުން އެއްވެސް އިދާރާއަކުން ކޮންޓްރޯލްކޮށް ބަލަހައްޓާ ނިޒާމެއް ނޫން) ވިޔަފާރިއެކެވެ. އާންމުކޮށް މިއުޅޭ ޓްރޭޑް ކުރާ ފަރާތްތަކަކީ ރީޓެއިލް ޓްރޭޑާރސް އެވެ. ރަނގަޅަށް ދަސްކޮށްގެން ޓްރޭޑް ކުރާނަމަ ގެއްލުން ވުމަށްވުރެ ގާތީ ފައިދާވުމެވެ. ނަމަވެސް ޖުވާގައި ދަސްކުރާނެ އިލްމެއް ނެތެވެ. އެއީ ހަމަ ސީދާ ކާޅަށް ކަނަކު ގަޅިއުކުން ފަދަ ކަމެކެވެ. އަދި މިޒަމާނުގެ ޖުވާގައި ތިޔަ ބޭނުން ކުރާ އެޕްގެ އަލްގަރިދަމް ހުންނަ ގޮތާ މެދު ވިސްނާލީމަވެސް ތިޔައީ މޮޔަކަމެއްކަން އެނގޭނެއެވެ.

އަޅުގަނޑުގެ ސިކުނޑިން ވިސްނައިގެން މިލިޔުނު މިންވަރަކީ ޖުވާއާއި ފޮރެކްސް ޓްރޭޑިންގ ގެ ތަފާތެވެ.