ޤައުމު ހިންގުމުގައި ޑިމޮކްރެޓިކް ނިޒާމު ބިނާކުރަންވާނީ އިސްލާމްދީނުގެ މައްޗަށް:ރައީސުލްޖުމްހޫރިއްޔާ

ޤައުމު ހިންގުމުގައި ޑިމޮކްރެޓިކް ނިޒާމު ބިނާކުރަންވާނީ އިސްލާމްދީނުގެ މައްޗަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. 

ރައީސް މިފަދައިން ވިދާޅުވީ ބައިނަލްއަޤްވާމީ ޑިމޮކްރަސީ ދުވަހުގެ މުނާސަބަތުގައި މިއަދު މީސް މީޑިއާގެ "އެކްސް"ގައި ކުރެއްވި ޕޯސްޓެއްގައެވެ.

ރައީސް ވިދާޅުވީ، ދިވެހި ޤައުމު ހިންގުމުގެ ޑިމޮކްރެޓިކް ނިޒާމު ބިނާ ކުރަންވާނީ، އިސްލާމްދީނާ، ދިވެހި ރައްޔިތުން ޤަބޫލު ކުރާ ހަމަތަކާއި ދިވެހިވަންތަ އާދަކާދަތަކުގެ މައްޗަށް ކަމަށެވެ.

ސަރުކާރުންދަނީ ރާއްޖޭގައި އަމަލުކުރަމުން އަންނަ 16 އަހަރުވީ، ދިވެހި ޤައުމުގެ ޑިމޮކްރެޓިކް ނިޒާާމް ހަރުދަނާ ކުރުމަށް އެތައް މަސައްކަތްތަކެއް ކުރަމުންނެވެ. އެގޮތުން ރާއްޖޭގެ ޝަރުޢީ ކޯޓުތަކުގެ މުސްތަޤިއްލުކަން އިތުރުކުރުމާާއި، މިނިވަން މުއައްސަސާތަކަށް އެޅިފައިވާ މިނިވަންކަމަށް ބުރުއަރާ ކަންކަން ދެނެގަނެ މިފަދަ ކަންކަން ނެތިކުރުމަށް ކުރަމުންދާ މަސައްކަތްތައް މިއީވެސް މިކަމުގެ ހެއްކެކެވެ.

ސަރުކާރުން ބޭނުންވަނީ އިސްލާމްދީނަށް ނަޞްރުދީ، އިސްލާމްދީނުގެ މާތް ސިފަތަކަށް ހުރިހާ ދިވެހީން އަހުލުވެރިކުރުވުމަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ މީގެކުރިން ވެސް ވިދާޅުވެފައެވެ.

މީގެއިތުރުން ދިވެހި އާދަކާދަތައް ދިރުވުމަށް ވަކިން ޚާއްސަކަމެއް ސަރުކާރުގައި ދެމުން އަންނަކަން ފާހަގަކުރެވެއެވެ. މިކަމުގެ އެއް ހެއްކަކީ މިސަރުކާރު އައިފަހުން ރާއްޖޭގައި އަލަށް ޤައުމިއްޔަތާއި ބެހޭ ވުޒާރާއެއް އުފެއްދެވުމާއި، އަދި ސަރުކާރުގެ ސްކޫލްތަކުގައި ޤައުމިއްޔަތު ވަކި މާއްދާއެއްގެ ގޮތުގައި ކިޔަވައިދޭން ފަށާފައި ވުމެވެ.

ކޮންމެ އަހަރެއްގެ 15 ސެޕްޓެމްބަރު ފާހަގަ ކުރަނީ ބައިނަލްއަޤްވާމީ ޑިމޮކްރަސީ ދުވަހުގެ ގޮތުގައެވެ.