އެޗްޕީއޭގެ އުސޫލްތަކާއި ޚިލާފުވެގެން 17 މީހުންނަށް ފިޔަވަޅު އަޅައިފި
އެޗްޕީއޭގެ އުސޫލްތަކާއި ޚިލާފުވެގެން 17 މީހުންނަށް ފިޔަވަޅު އަޅައިފިއެވެ.
ސިޓީ ކައުންސިލްގެ ޑިރެކްޓަރ ނިޖާހް މައުލޫމާތު ދެއްވަމުން ވިދާޅުވީ މީގެތެރެއިން 3 ފަރާތެއް ކަރަންޓީނު އުސޫލްތަކާއި ޚިލާފުވެގެން ފިޔަވަޅު އަޅާފައިވާކަމަށާއި އެއީ ހުއްދަ ނުހޯދާ ފުވައްމުލަކަށް ދަތުރުކޮށްގެން، 3 ފަރާތެއް މާސްކު ނާޅާ ބޭރުތެރޭގައި އުޅެގެން ޖުރުމާނާ ކުރިއިރު، 8 ފަރާތެއް ވަނީ ކާފިއުގަޑީގައި ހުއްދަނެތި ބޭރުގައި އުޅެގެން ޖުރުމާނާ ކޮށްފައެވެ.
އަދި 2 ފަރާތެއް ޒަރޫރީ ބޭނުމެއްގައި ނޫން ގޮތަކަށް ބޭރުގައި އުޅެގެން ވެސް ޖުރުމާނާ ކޮށް ފިޔަވަޅު އެޅިއިރު 1 ފަރާތެއް ވަނީ އެއް ގެއިން އަނެއްގެއަށް ނުދިއުމަށް އަންގާފައިވާ އުސޫލާ ޚިލާފުވެގެން ޖުރުމާނާ ކޮށްފައެވެ.
ނިޖާހު އިތުރަށް ވިދާޅުވީ، ކައުންސިލްގެ މިންގަނޑަށާއި އެޗްޕީއޭގެ އެންގުންތަކަށް ކިޔަމަންވުމަށް އިލްތިމާސް ކުރެއްވިއެވެ.
މީގެ އިތުރުން ކައުންސިލް މެމްބަރ ޢައިޝަތު އަބްދުލް ޤާދިރު ވިދާޅުވީ، ހުރިހާ ރައްޔިތުން ވެގެނ ވީހާވެސް އަވަހަކަށް މިބަލިން އަހަރެމެން އާއްމު ހާލަތަށް ބަދަލުވާން މަސައްކަތް ކުރަން އެބަ ޖެހޭ ކަމަށެވެ.
މިހާހިސާބުންވެސް ހެދިފައި ތިބި ޤަވާއިދު ތަކަކީ ކޮންމެހެން އަޅުގަނޑުމެންނަށް އުނދަގޫ ކުރުމުގެ ބޭނުމުގައި ހެދިފައި ހުރި ޤަވާއިދު ކަމަށް ބަލައިގެން ނުތިބެ، ވީހާވެސް ޤަވާއިދަށް ހުރުމަތްތެރިކޮށް ހިތައިގެން އަހަރެމެންނަށް ވީ މަސައްކަތެއް ކޮށްގެން އާއްމު ހާލަތަށް އައުމަށް މަސައްކަތް ކުރަންވީއެވެ.